غربة والوان/د.احمد توفيق
غُــربـــة وألــــــــوان
كلمات زجليّة بقلمي/ أحمد توفيق
يا غربة فيكي العجب...
فيكِ النفوس ألوان
فيكِ اللي خالي الأدب...
وفيكِ الأصيل ينهان
فيكِ استخبى الديب...
وعامل لي قال إنسان
واللي ضميره يغيب...
يمشي مع الكسبان
والأصل فيكي غريب...
يتوه في أي مكان
والعيب يقول للعيب...
حمد الله ع التوهان
***
يا غربة جَمَعِتْ ناس...
في صفيحة مرميّة
فيها ضمير ينداس...
ونفوس مصديّة
والحلو فيها قليل...
واحد وموش ميّه
يتوه في زحمتها...
ولا ييجي غير بالجان
يتلخبط الإحساس...
يتحَس بالنيّه...
ومصيبة بالمجان...
وهريسة بالبهارات...
وطعميّة بالشربات...
والكل في بدنجان...
وتتغيّر الألوان
***
اسمك يا غربة لعين...
وحروفه تتفسّر...
الغين دي "غدر" سنين...
جايّه بتتمخطر
والراء "رحيل" ولمين؟...
لكل شيء أخضر
والباء "بكاء" وأنين...
وشكوى ليك يا زمان...
والهاء يا غربة "هوان"...
في عتامة الألوان
***
يا غربة ليه غربتك...
قتَلتْ أمانينا؟
خدتينا ليه بصحبتك...
تتحكمي فينا؟!
دا اللي يدوق لَسْعِتِك...
يحلف ليسقينا
ما احنا خلاص لعبتك...
واحنا اللي غنينا
غنوّه مع النسيان...
واللحن زي العمر...
ماتت فيه الألحان...
ودبلت أغانينا
والضحكة وسط غيطان...
دبْلِتْ في قمحايه...
لا تشوفها شمسايه...
ولا ضل شجره يبان
ولا نسمه تحيينا
تعليقات
إرسال تعليق